Ceisteanna agus Freagraí ó Scoláirí Dlí agus Gaeilge atá Thar Lear - Cuid 2
Le Orla Leahy
Baineann an t-alt seo le ceisteanna faoin gcúrsa Erasmus le scoláire ón dtríú bliain, Katie Moynihan, atá ag déanamh staidéir in Konstanz don bhliain Erasmus aici.
Cén fáth gur phioc tú an áit ina bhfuil tú don Erasmus?
An príomhrud is ea go bhfuil Gearmáinis agam ón meánscoil agus bhí fonn orm mo chuid Gearmáinise a fheabhsú. Nuair a chonaic mé na pictiúirí den áit, chomh maith leis sin, bhí sé ar nós ruda ó shíscéal. Is áit álainn í, idir Loch Konstanz agus na hAlpa, le mórán deiseanna taistil. Tá an baile suite ar theorainn na Gearmáine leis an Eilvéis agus thar an loch; tá an Ostair.
Cad é an rud is fearr (i) sa chathair sin agus (ii) san ollscoil sin go dtí seo?
Ceapaim go bhfuil an meascán de theangacha agus de chultúir atá le feiceáil i mbaile chomh beag le Konstanz an-suimiúil ar fad. Bíonn muintir na hEilvéise ag teacht thar an dteorainn chun a gcuid siopadóireachta a dhéanamh ag an deireadh seachtaine agus is minic a chloisfidh tú na canúintí difriúla timpeall na háite - an “ghnáth-Ghearmáinis,” Gearmáinis na hEilvéise agus (uaireanta) Gearmáinis na hOstaire. Níl i gceist le daonra Konstanz ach leath-daonra Chorcaí ach fós feictear réimse leathan cultúr ann.
Níl an seimeastar tosnaithe fós anseo ach tá roinnt mionchúrsaí déanta agam faoin dteanga agus faoin gcóras dlí sa Ghearmáin. Níl mórán difríochtaí idir an ollscoil anseo agus COC go pointe áirithe ach ceapaim go bhfuil leagan amach fisiciúil na hollscoile seo i bhfad níos éasca. Níl cliú agam cá bhfuil leath des na foirgnimh i gCOC fós ach is féidir liom gach seomra a aimsiú anso go héasca! Ní rud ollmhór é ach déanann sé an saol beagáinín níos éasca domsa.
3. An mbíonn deiseanna ann do chuid Gaeilge a úsáid? Cad iad na teangacha eile a bhíonn á labhairt ansin agat?
Níl aon deiseanna anseo chun Gaeilge a labhairt, faraor. Bíonn Béarla á labhairt san ollscoil don chuid is mó cé gur scoil an-idirnáisiúnta í agus labhraím Gearmáinis sa bhaile agus i roinnt léachtaí (ag brath ar theanga mhúinte an mhodúil féin). Tá an-suim ag roinnt des na scoláirí idirnáisiúnta sa Ghaeilge, áfach, agus is minic a chuireann siad ceist orm rud éigin a rá as Gaeilge - rudaí fíor-shimplí ar nós “Katie is ainm dom” nó “Conas atá tú?”.
4. Cad é an rud is mó a bhfuil tú ag tnúth leis i mbliana is tú sa chathair sin?
Tá roinnt turas eagraithe againn agus ag an gcoláiste ina bhfuilim féin, táim féin ag tnúth leis go mór; go mórmhór agus mé thar lear cheana féin. Beimid ag dul ag sciáil i mí Eanair agus beimid ag dul ar thuras 3 cinn de thíortha; chuig an Eilvéis, an Ostair agus Lichtinstéin i gcóir lá amháin i mí na Nollag. Mar a dúras cheana, tá an iomarca deiseanna taistil anseo agus is féidir le duine siúl go dtí an Eilvéis fiú ó m’árasán féin.
5. An mbíonn tú ag déanamh aon taisteal timpeall na hEorpa agus má bhíonn tú; cad é an áit is iontaí ina raibh tú go dtí seo?
Chuamar go baile beag darbh ainm dó Meersburg atá thar an loch anso an tseachtain seo caite; rud a bhí an-suimiúil. Is seanbhaile é a bhí tógtha ar taobh sléibhe. Tá caisleán ollmhór ann agus bítear ag táirgeadh fíona ann - tá fíniúnacha ag fás ar fud an bhaile agus tá sé chomh deas le Caisleán na Blarnan, fiú. An lá a chuamar ann, bhí saghas féile mheánaoiseach ar siúl agus bhí gach duine gléasta sna héadaí ón am sin agus iad ag déanamh athléiriú ar roinnt de na postanna a bhí ag muintir na háite na céadta bliain ó shin. Táim ag tnúth go mór leis an sciáil in San Anton san Eilbhéis, chomh maith.
6. Aon rud eile le roinnt agat leis na léitheoirí againne?
Má tá seans ag éinne dul go Konstanz chun staidéir nó chun cuairt a thabhairt air fiú, molaim go láidir é. Is baile ar leith é agus ní gheofá an taithí atá le fáil anseo in aon áit eile.